O Polo de Emprendemento de Friol acolleu unha xornada de conexión arredor do Queixo de Friol e o Pan de Ousá
O Polo de Emprendemento e Apoio ao Emprego da Xunta de Galicia en Friol acolleu este xoves unha xornada de conexión que reuniu a produtoras, produtores e persoas emprendedoras vinculadas a dous dos produtos máis representativos do municipio: o Queixo de Friol e o Pan de Ousá.
O acto foi inaugurado polo alcalde de Friol, José Ángel Santos, quen deu a benvida ás persoas asistentes e destacou a importancia de apoiar e visibilizar o produto local como motor de desenvolvemento económico e social no rural, así como o papel fundamental das persoas produtoras e emprendedoras na dinamización do territorio.
A xornada contou tamén coa participación da directora xeral de Emprego, Marta Mariño, e da directora territorial da Consellería de Emprego, Comercio e Emigración en Lugo, Carmen José, que acompañaron ás persoas asistentes nun espazo de diálogo e intercambio de experiencias arredor do sector agroalimentario no rural.
Durante o encontro abordáronse cuestións clave para o presente e o futuro do sector, como o relevo xeracional, a incorporación da innovación nos procesos produtivos, os retos da comercialización ou a importancia da colaboración entre proxectos do territorio para reforzar o valor do produto local.
Ademais, a sesión serviu para dar a coñecer recursos e ferramentas de apoio ao emprendemento dispoñibles a través da rede de Polos de Emprendemento da Xunta de Galicia, así como para fomentar a creación de sinerxías entre iniciativas locais vinculadas á produción agroalimentaria.
Esta xornada de conexión permitiu fortalecer a rede entre profesionais do sector, identificar oportunidades de colaboración e seguir impulsando o papel do produto local como motor de desenvolvemento económico e social no rural.
Desde a organización destacouse a alta participación e o interese mostrado polas persoas asistentes, agradecendo a implicación de todas elas para facer posible un encontro enriquecedor que pon en valor o talento e o potencial do territorio.