O PortaMiñá destaca no Campionato Galego Infantil coa segunda posición
Esta fin de semana disputouse en Pontevedra o Campionato Galego Infantil de natación, onde o equipo PortaMiñá logrou unha meritoria segunda posición na clasificación conxunta.
Tras unha intensa competición de dous días, o conxunto lucense loitou ata o final co Pabellón de Ourense, que finalmente se proclamou campión do torneo.
Por categorías, o equipo feminino do PortaMiñá tamén obtivo o segundo posto, mentres que o conxunto masculino finalizou en quinta posición. Este evento marcou o peche dos campionatos galegos de inverno nas súas distintas categorías, onde o PortaMiñá demostrou ser un dos grandes dominadores da natación autonómica grazas aos brillantes resultados obtidos.
Medallas do PortaMiñá
Celia López colgouse o ouro en tres probas individuais: 50 costas, 100 costas e 100 bolboreta na categoría de 15 anos. Alba Lema, pola súa banda, logrou o primeiro posto nos 100 metros costas (14 anos). Adrián Fernández brillou con catro ouros nas probas de 400 libres, 800 libres, 1500 libres e 400 estilos (14 anos). Ademais, os relevos femininos do 4x100 estilos, 4x100 libres e 4x200 libres tamén conseguiron o ouro, cun equipo composto por Aroa Illán, Laura Abuín, Celia López e Antía Prieto.
Pola súa parte, Antía Prieto logrou a medalla de prata nos 200 metros libres e 200 estilos (14 anos). Aroa Illán subiu ao segundo chanzo do podio en tres probas: 200 estilos, 50 libres e 400 libres (15 anos). Alba Lema completou a colleita de pratas coas súas actuacións en 50 costas e 200 costas (14 anos).
Finalmente, na categoría de 15 anos, Aroa Illán fíxose co bronce nos 100 metros libres, mentres que Miguel Zambrano logrou o terceiro posto nos 200 metros bolboreta. Antía Prieto, na categoría de 14 anos, obtivo o bronce en 400 estilos. Finalmente, Celia López sumou outro bronce nos 50 metros bolboreta (15 anos).
Con este resultado, o equipo PortaMiñá reafirma o seu excelente desempeño na natación galega e segue consolidándose como un dos referentes do panorama autonómico.
Campionato Autonómico de Inverno de Natación Artística
Por outra banda, o equipo sénior do PortaMiñá logrou unha destacada medalla de bronce na rutina acrobática durante o Campionato Autonómico de Inverno de Natación Artística, disputado en Ourense.
O equipo estivo formado polas exnadadoras Cristina López, Marta Fernández, Ángela Varela, Raquel López, Lola Mourenza, Lara Rivero, Claudia Pia, Uxía Díaz e Naila Díaz, que contaron co apoio da súa exadestradora Lorena Millares.
"A dificultade para reunirse e adestrar, debido a que moitas delas xa non residen en Lugo, facía impensable a preparación dunha rutina competitiva. Porén, o seu talento e experiencia permitíronlles ofrecer unha actuación que lles valeu un lugar no podio", explican desde o club.
Este resultado demostra a calidade e o compromiso das integrantes do equipo, que, a pesar das circunstancias, lograron destacar nunha competición esixente.