O portavoz do PP de Castroverde, Pablo Figueiras, condena a actitude de José María Arias no pleno
O portavoz do PP de Castroverde, Pablo Figueiras, condena a actitude de José María Arias no pleno deste xoves, onde os concelleiros populares “nos vimos na obriga de abandonar ante os insultos reincidentes cara a dous concelleiros do noso grupo. O seu ton e as súas formas non son axeitadas”.
Así, din que “esta actitude e este trato por parte do alcalde aos concelleiros do PP repítese de forma habitual nas sesións plenarias. En lugar de exercer de moderador do debate e manter as formas como lle corresponde a un alcalde que é o máximo representante dos veciños e veciñas de Castroverde, eleva o ton e insulta. Este é o proceder habitual”, segundo explica o popular.
O rexedor socialista chamoulle en varias ocasións a un concelleiro “cacique” e seguidamente díxolle que “non tes que intervir e, senón, vaste”. Ante esta situación outro concelleiro do PP sinalou que non ía permitir que insultase a un compañeiro e a resposta do alcalde foi cualificalo tamén de cacique.
Polo tanto, “os catro representantes do Partido Popular no Pleno decidimos abandonar porque consideramos que non se deben permitir estas actitudes”, dixo Figueiras.
O portavoz subliña que “ao alcalde socialista parece que lle molesta o noso traballo e a nosa presencia nos plenos”. Pero ten que ter en conta que “se debe respectar aos integrantes da corporación local como representantes dos veciños e veciñas de Castroverde. Non debería actuar como dono e señor do Concello”.