O PP acusa ao goberno local de Lugo de bloquear solucións para os colexios públicos
O Grupo Municipal do Partido Popular de Lugo acusa ao goberno local, formado por PSOE e BNG, de manter unha actitude de inacción e bloqueo político que está a afectar á rede de centros educativos públicos da cidade.
Os populares sinalan como exemplo máis grave o derrubamento parcial da cuberta do CEIP As Mercedes, onde foi a Xunta de Galicia quen tivo que intervir con urxencia substituíndo 700 metros cadrados da estrutura antes do inicio do vindeiro curso escolar. Segundo o PP, a situación é froito da desatención continuada por parte do Concello no mantemento dos colexios, algo que levan denunciando reiteradamente.
Outro dos casos que, a xuízo do PP, evidencia esa parálise é o da Escola Infantil Fingoi II, onde existe unha necesidade urxente de habilitar un comedor escolar. A pesar de tratarse dun centro de titularidade municipal, o Concello estaría agora tentando que sexa a Xunta quen redacte o proxecto e execute as obras dun comedor definitivo, unha solución que levaría tempo e que non resolvería a curto prazo as necesidades das familias.
Por iso, a Xunta propón instalar unha aula portátil que funcione como comedor a partir de setembro, sempre que o Concello ceda a parcela necesaria para a súa ubicación. Os populares critican que, a día de hoxe, esa cesión segue sen formalizarse, o que impide que a medida poida levarse a cabo nas vindeiras semanas. Desde o Partido Popular denuncian que o goberno local está a alargar os prazos deliberadamente por motivos políticos, sacrificando un servizo esencial para as familias lucenses como é o comedor escolar.
Ademais, lembran que a falta de mantemento nos colexios públicos non é un problema puntual, senón unha constante, con traballos pendentes desde hai anos como a limpeza de arquetas, arranxos en instalacións, melloras en accesibilidade ou reforzo de persoal.
Por todo isto, o PP esixe ao goberno municipal que asuma as súas competencias, actúe con responsabilidade e axilidade, e deixe de obstaculizar as iniciativas doutras administracións que buscan mellorar as condicións dos centros educativos da cidade.