O PP critica "a complicada situación" de tramitar licenzas en Lugo
O PP no Concello de Lugo denuncia “a complicada situación que teñen os lucenses á hora de tramitar licenzas de obra no concello”. Fan estas declaracións logo dunha reunión con colexios profesionais e con representantes da Asociacion Provincial de Empresarios de la Construcción (APEC).
O dato que desvela que “a situación sigue empeorando” témolo na comparativa de licencias resoltas no período comprendido entre xaneiro a maio de 2021 e 2022.
No ámbito urbano “o pasado exercicio resolvéronse en xunta de goberno 94 expediente e neste mesmo paréntese de tempo do actual exercicio só saíron 39 licenzas”. No tocante aos expedientes da zona rural mantense o ritmo con “38 licenzas concedidas en 2021 ás 37 licenzas deste 2022”.
Os populares enumeraron as diferentes propostas realizadas “co ánimo constructivo para desatascar o pescozo de botella no que están as licenzas de obra: empregar as ECCOM ou contratar asistencias técnicas puntuais para desbloquear esta situación así como continuar insistindo en recuperar a atención persoal no servizo”.
A última petición sobre esta cuestión foi un rogo que o PP presentou no pleno de onte para conseguir que o concello expida “un documento que avale o criterio da primeira consulta técnica sobre un proxecto para evitar cambios de interpretacións”.
O goberno local saíuse “pola tanxente” ao rexeitar esta petición argumentando que “o que se pedía estaba fóra da lei. Esta resposta para o PP “é unha escusa absurda que non se fundamenta en ningunha base legal”.
Os populares insisten en que “non podemos permitir que se siga a frear o investimento en Lugo” que cifran nuns 50M€ parados máis os incrementos dos custes polo colapso do servizo municipal, unha situación que está paralizando a economía local.