O PP de Castroverde cuestiona ao alcalde pola súa negativa a permitir a emisión en directo dos plenos
Os concelleiros do Grupo Municipal do PP de Castroverde volveron interpelar ao alcalde ao considerar que “algo ten que ocultar” para continuar rexeitando que os plenos municipais se poidan emitir en directo e queden gravados para o seu visionado posterior.
O voceiro popular, Pablo Figueiras, lamentou que, unha vez máis, o rexedor e o seu equipo de goberno votasen en contra da proposta presentada polo PP para permitir a retransmisión en streaming das sesións plenarias e autorizar a súa gravación. Figueiras criticou que o alcalde “se negue a algo tan básico como permitir que todos os veciños coñezan os asuntos que se debaten no pleno e a postura de cada grupo político”.
O portavoz municipal considera que esta reiterada oposición “só responde ao interese do alcalde por impedir que quede constancia pública do seu comportamento durante as sesións”. Segundo explicou, a negativa do rexedor podería estar relacionada “coa súa falta de educación, coas continuas faltas de respecto e coa súa resistencia sistemática a apoiar iniciativas beneficiosas para Castroverde, cuestións que quedarían rexistradas sen posibilidade de manipulación e que, ao parecer, o alcalde prefire ocultar”.
Figueiras denunciou que “o goberno municipal volve dar as costas ao dereito das veciñas e veciños a saber o que ocorre nos plenos, cal é a posición de cada formación política e que actitudes manteñen os seus representantes públicos”. Engadiu que esta é “a idea de transparencia que ten o alcalde, que continúa bloqueando unha proposta que só busca garantir información fiable, accesible e libre de manipulacións”.
Os concelleiros populares insistiron en que “os plenos non son un ámbito privado nin un espazo para o uso partidista, senón o principal órgano de representación municipal, e como tal deben poder seguirse en directo ou consultarse posteriormente por calquera veciño que o desexe”.