O PP de Cervantes esixe investigar trabas no rexistro de voluntarios en Protección Civil
O portavoz do Grupo Municipal do PP de Cervantes, Óscar Fernández, reclama ao alcalde a apertura de expedientes de investigación sobre o impedimento para rexistrar no Concello solicitudes de alta de voluntarios na Agrupación Local de Protección Civil e posibles discriminacións e irregularidades.
O popular vén de rexistrar unha solicitude formal dirixida ao rexedor tras ter coñecemento, a través de testemuñas de persoas afectadas, que o Concello está a impedir o rexistro de solicitudes de aspirantes a voluntarios.
Fernández esixe explicacións e responsabilidades ante o que considera “un feito de extraordinaria gravidade” toda vez que “vulnera tanto a propia lei de Bases de Réxime Local coma o regulamento da propia agrupación”.
O portavoz do PP no municipio, que lembra que a agrupación de voluntarios de Protección Civil depende do Concello, censura que “se permita esta posible discriminación” vulnerando o “principio de igualdade”.