O PP de Cervantes logra o compromiso da Xunta para solucionar os desaxustes nas rutas de transporte escolar
O Partido Popular de Cervantes, en resposta á preocupación manifestada polos pais e nais do alumnado do CPI de Cervantes debido a un desaxuste nas rutas de transporte escolar tras a súa última modificación, interesouse por coñecer os detalles do problema e buscar unha solución, tal como solicitaron as familias afectadas ao portavoz popular, Óscar Fernández.
Tras trasladar a situación á administración autonómica, esta analizou o caso e comprometeuse a resolvelo á maior brevidade posible, segundo comunicou á comunidade educativa, incluíndo á ANPA e ao propio centro.
O portavoz popular, Óscar Fernández, destacou: “Pretendemos ser útiles aos nosos veciños e veciñas, polo que intentamos ser áxiles á hora de atender os problemas e buscarlles solución”. Neste sentido, explicou que “unha vez detectado o desaxuste, trasladamos a situación aos representantes da Xunta de Galicia para analizar en detalle a ruta do transporte escolar no municipio. Unha vez identificadas as posibles melloras, comprometéronse a implantalas nos próximos días”.
Fernández tamén quixo agradecer, en nome do PP de Cervantes, a disposición dos representantes do Goberno galego por “atender as necesidades dos nosos veciños e veciñas e, máis concretamente neste caso, dos nenos e nenas e as súas familias”. Así mesmo, expresou o seu desexo de que “as rutas recuperen a normalidade canto antes” para que “a comunidade educativa continúe desenvolvendo a súa actividade sen incidencias”.
As rutas, segundo se comunicou ao centro e á ANPA, serán modificadas do seguinte xeito:
1.- Savane – Quindous – Ardevila – Quindous - Couso - Sabadelle - Tarnas - San Martín da Ribeira - San Román. 2.- Cantiz - Vilar de Cancelada – Dumia – Eilarrio - San Román.
Con este compromiso, o PP de Cervantes reforza o seu labor de intermediación entre a comunidade educativa e a administración autonómica, garantindo melloras no servizo de transporte escolar do municipio.