O PP de Lugo acusa ao goberno local de deixar sen investir 26 millóns de euros
![concello lugo](https://lugoxa.com/wp-content/uploads/2021/07/concello-lugo.jpg)
O vicevoceiro do Grupo Popular Antonio Ameijide resumía en tres ideas os datos que lles presentou o bigoberno sobre a Conta Xeral correspondente ao exercicio do ano 2020. “As ganas e os tempos novos que anunciou o PSOE xa se esfumaron xa que as cifras reflicten que houbo unha baixa execución dos investimentos”. Afirman que o ano pasado quedaron sen investir máis de 26 millóns de euros cunha porcentaxe "ínfima" de execución do Plan de investimentos de a penas o 19%. “Son millóns de euros que quedaron sen empregar pola parálise do bigoberno, que viría moi ben para mellorar os barrios e parroquias do municipio” manifestou.
Os populares tamén consideran “desolador que siga aumentando a cifra de incobrados alcanzando máximos históricos con máis de 22M€ de saldos de dubidoso cobro durante os anos nos que Lara Méndez é alcaldesa que abranguen o periodo de 2015 ata a actualidade".
Noutra orde de cousas, os populares aínda que son conscientes que a pandemia provocou unha baixada de ingresos nas arcas municipais manifestaron que había previsións de impostos "totalmente infladas". Ameijide lembrou como o bigobierno ingresou "menos da metade do que preveía, en concreto uns 80 millóns menos da previsión de ingresos que figuraba na conta xeral 2020".
Neste senso destacou os datos relativos a varios impostos relacionados coa construción e listaron os que consideran "problemas de funcionamento e a parálisis no departamento de urbanismo o que supuxo un freo para que evolucionase este sector":
- "No ICIO, nas licenzas urbanísticas e en apertura de establecementos as previsións rexistran desfases negativos de máis do 60%".
- "Canto ás infracións urbanísticas a recaudación neta foi de 6.000 € fronte aos 250.000 € que preveían, por tanto so ingresaron o 2,4% do que puxeron no papel".
- "É curioso que nas execucións subsidiarias o bigoberno ingresara cero euros cando tiña unha partida de 250.000 € para limpeza de parcelas, apuntalamento de edificios en ruína … etc"
- "Co Imposto da plusvalía pensaban ingresar 2.700.000 € pero o ingreso real foi de 529.000 € faltando por percibir o 80% do planificado".
"Por último resulta chamativo o desfase brutal tamén nos ingrsos polo lixo e auga, no que se preveía recadar 14.993.000 € e quedaron sen cobrar 6.289.000 €, un 49% do total previsto no documento", din.
TRANSFERENCIAS CORRENTES
Afirman que dos 3.193.000 € que preveían ingresar da Unión Europea unicamente xustificaron 29.000 €. "Esta cifra revela a falta de execución que retrasa a recepción dos fondos europeos".
No capítulo doutras transferencias da Unión Europea, "no que preveían ingresos de 2.704.000 € non percibiron nada". “En ambos casos esta rebaixa débese a baixa execución das obras e aquí non poden poñer como excusa a pandemia” aclaran os populares.
"Tamén é chamativo que sendo un goberno amigo o da Deputación só ingresaran a metade das transferencias correntes que presupostaron. Dos 750.000 € que anotaron só hai en caixa 379.000 euros, indican."
Antonio Ameijide remataba cunha mensaxa ao BNG “os socios de gobernos do PSOE non poden irse de rositas porque teñen a metade da responsabilidade no fiasco das contas municipais”.