O PP de Lugo continúa a traballar para dar o nome de Tomás Notario Vacas á ponte das Saamasas
A voceira do Grupo Municipal do Partido Popular de Lugo, Elena Candia, mantivo unha reunión de traballo coa deputada nacional por Lugo, Cristina Abades, para facer seguimento á proposta do Colexio de Enxeñeiros de que a ponte de As Saamasas leve o nome de Tomás Notario Vacas, como homenaxe ao seu legado.
Esta iniciativa xa foi tratada no pleno do Concello de Lugo, pero desde o PP denuncian que o Goberno local non se implicou máis alá de cumprir cun trámite burocrático. “Xa advertimos no seu momento da falta de compromiso do executivo municipal, polo que decidimos asumir un papel activo e trasladar esta proposta ao Ministerio de Transportes a través dos nosos representantes en Madrid”, explicou Elena Candia.
Dende o PP consideran que este recoñecemento “non debe quedar nun simple procedemento administrativo”, e insisten en que a figura de Tomás Notario Vacas merece ser homenaxeada formalmente. “Queremos que a ponte de As Saamasas leve oficialmente o seu nome, en recoñecemento á súa traxectoria e ao seu legado”, destacou Candia.
O Partido Popular reafirma así o seu compromiso coa posta en valor das figuras destacadas da historia local, impulsando accións que contribúan á memoria e ao recoñecemento público daqueles que deixaron unha pegada significativa na sociedade lucense.