O PP de Lugo pon en valor a mellora na estrada LU-546 ao seu paso por Nadela
O Grupo Municipal Popular de Lugo expresou o seu agradecemento á Xunta de Galicia pola recente intervención realizada na LU-546, no seu entronque en Nadela, que inclúe a reparación da zona de estacionamento diante do Centro de Saúde.
"Esta actuación responde ás solicitudes dos veciños da zona e representa un importante avance en materia de seguridade e accesibilidade para os usuarios do consultorio", explican os populares.
A intervención foi solicitada polos veciños durante a presentación da proposta do Grupo Popular para a humanización deste tramo, realizada o pasado 17 de febreiro.
Naquel encontro, os residentes trasladaron a necesidade de mellorar a zona de aparcamento, que presentaba desperfectos e dificultaba a mobilidade.
A reparación actuou na eliminación dos problemas de acumulación de grava na calzada, mellorando a seguridade viaria e facilitando o tránsito para os usuarios do Centro de Saúde.
A portavoz popular, Elena Candia, destacou a "rápida resposta da Xunta, porque estas melloras supoñen un beneficio directo para os veciños de Nadela".