O PP denuncia a situación “extremadamente grave” do Centro de Interpretación da Muralla
O Grupo Municipal do Partido Popular denunciou a situación “extremadamente grave” do Centro de Interpretación da Muralla, despois de que o concello se virase obrigado a pechar temporalmente as instalacións debido a unha praga de roedores.
Para o portavoz do PP, Agustín Gallego, este caso resume o modelo do goberno local de Lugo, que “non traballa, non cumpre e tampouco coida do que é de todos. Só se activan para confrontar coa Xunta, mentres son incapaces de garantir o mantemento básico dunha sala que explica a esencia da nosa Muralla. É unha falta de respecto ao noso patrimonio e á imaxe que Lugo proxecta ao exterior”.
Segundo a documentación á que tivo acceso o PP, o 15 de outubro rexistrouse unha incidencia alertando da presenza de roedores e da aparición de novos buratos. A revisión realizada o 17 de novembro confirmou de novo a situación, demostrando que o problema vén de lonxe e que o goberno local non tomou medidas efectivas nin urxentes para protexer un espazo que serve como porta de entrada e información para os turistas.
Ademais da praga, outras deficiencias detectadas no Centro de Interpretación da Muralla inclúen medios dixitais e recursos interactivos fóra de servizo, unha última revisión do aire acondicionado realizada en 2023 sen solucionar problemas no sistema de extracción de fume, o sistema contra incendios desactivado desde 2020 e a ausencia de alarma antiincendios, luces de emerxencia inoperativas e numerosos focos fundidos que afectan á iluminación da exposición.
O edil do PP advertiu que a situación do Centro de Interpretación da Muralla non é un caso illado, senón que reflicte o deterioro dos museos municipais en xeral. Por iso esixen unha acción inmediata que inclúa unha revisión técnica integral de todos os museos municipais e un plan de mantemento preventivo estable e calendarizado.