O PP denuncia falta de previsión na Deputación e esixe xeradores en todos os centros de maiores
O voceiro provincial do Partido Popular, Antonio Ameijide, denunciou a falta de previsión do Goberno á fronte da Deputación de Lugo tras a contratación dun servizo de aluguer de xeradores eléctricos para as residencias de maiores de Castroverde, A Fonsagrada e Ribas de Sil, cun custo de 1.984,40 euros.
Ameijide destacou que este tipo de servizos deberían estar en funcionamento desde hai anos para garantir o subministro eléctrico en situacións vitais, como ocorreu en abril con apagóns ou cortes constantes en Ribas de Sil.
O voceiro popular subliñou que a garantía do subministro eléctrico é fundamental non só para usuarios con respiradores ou necesidades médicas, senón tamén para a seguridade dos residentes, permitindo usar escaleiras con seguridade ou que persoas en cadeira de rodas poidan acceder aos seus cuartos mediante ascensores.
Segundo Ameijide, a contratación evidencia a “total falta de previsión” do goberno provincial, xa que en outros centros da rede foron os propios concellos os que instalaron xeradores.
Ante esta situación, o PP instará á Deputación a instalar xeradores en todos os centros de atención a maiores e a ofrecer asesoramento aos concellos para reclamar ante o Ministerio e as compañías subministradoras un correcto subministro eléctrico nos municipios.