O PP denuncia que as recentes obras na cuberta do Paciño non solucionan as goteiras
A Deputación de Lugo acaba de contratar traballos de reparación na cuberta dos Anexos do Pazo dos Deportes, coñecidos popularmente como o Paciño, tras comprobar que, a pesar das obras realizadas hai poucas semanas e que custaron 320.000 euros, persisten numerosas goteiras cada vez que chove.
Antonio Ameijide, voceiro do Partido Popular, agarda que a recente contratación por 580,80 euros sirva para dar unha solución definitiva aos problemas que arrastran desde hai anos estas instalacións, que son usadas a diario por centos de lucenses para os seus adestramentos e encontros oficiais durante os fins de semana.
Ameijide cuestiona ao goberno provincial do PSOE e BNG por recorrer a unha nova contratación para solucionar estes fallos en lugar de facelo a través da garantía das obras iniciais. O voceiro popular lembra que tanto as familias dos deportistas como o propio PP veñen reclamando desde hai anos unha solución para un pavillón que debería ser un lugar idóneo para adestrar e competir, pero que en realidade xerou máis problemas dos que resolveu.
A borrasca Olivier puxo en evidencia que a reforma, rematada fai poucas semanas, foi unha “chapuza”, xa que desde o comezo da choiva a auga entraba facilmente no interior do pavillón, demostrando que as reparacións non foron efectivas a pesar da gran inversión realizada.