O PP denuncia que os hortos urbanos de Fontiñas "levan un ano sen funcionar"
O Grupo Municipal Popular de Lugo denuncia un exemplo do que consideran “a ineficacia do falso ecoloxismo” do goberno local.
O foco das críticas céntrase nos hortos urbanos de Fontiñas, un proxecto que, segundo os populares, leva un ano sen funcionar malia os 60.000 euros investidos e as reiteradas promesas do executivo municipal.
A concelleira popular, Mar Carballas, lembrou que o actual alcalde, Miguel Fernández, foi quen presentou en 2018 esta iniciativa como concelleiro de Medio Ambiente, destacándoa como un dos piares do modelo sostible e participativo.
Na Xunta de Goberno do 20 de marzo de 2024, aprobouse a listaxe provisional da terceira convocatoria de adxudicación dos hortos. Dos 32 espazos dispoñibles só se cubriron 27, e cinco quedaron sen demanda a pesar das campañas de promoción realizadas polo Concello.
Para disimular esta escasa acollida, o PP afirma que se aceptaron solicitudes fóra de prazo, se adxudicaron parcelas a persoas que xa foran beneficiarias no 2021 e se deu por boa documentación presentada fóra de prazo en seis casos. Ademais, critican que se admitiu a solicitude dunha persoa non empadroada en Lugo.
Carballas engadiu que as deficiencias non se limitan ao proceso administrativo. Segundo recolleu o PP, unha das persoas adxudicatarias leva un ano esperando a poder cultivar, xa que o Concello non acondicionou a terra como prometera. “Un ano sen poder plantar nada demostra que non só non planificaron ben, senón que tampouco foron quen de manter o proxecto”, subliñou a concelleira.