O PP insta a Lugo a mellorar a protección de usuarios e traballadoras do SAF
O Partido Popular reclamou que o Concello de Lugo exerza plenamente as súas competencias sobre o Servizo de Axuda no Fogar (SAF), aprobando protocolos que protexan tanto aos usuarios como ás traballadoras, e avanzando cara á creación dun convenio propio que mellore as súas condicións laborais.
A voceira popular subliñou que, cun orzamento municipal de máis de 121 millóns de euros, o Concello debe facer unha aposta decidida polas persoas, especialmente cando se trata dun servizo de competencia municipal. Entre as medidas solicitadas destacan a aprobación de protocolos de prevención e protección e a implantación dun convenio propio, seguindo o modelo aplicado ás traballadoras da limpeza dos edificios municipais, para as que se acadou un acordo no pleno de marzo de 2024.
O PP sinalou que esta iniciativa se impulsa por varios motivos: a finalización do contrato do SAF o próximo ano, a necesidade de decidir sobre a súa privatización, a coincidencia co caso ocorrido en Porriño e, sobre todo, as denuncias reiteradas das traballadoras lucenses sobre situacións de desprotección.
Entre os problemas revelados destaca unha instrución interna que obriga ás traballadoras a esperar 15 minutos no domicilio se o usuario non está, sen percibir retribución por ese tempo, que ademais queda rexistrado como débeda coa empresa. Tamén se denuncian despedimentos tras baixas médicas, unha práctica que evidencia a precariedade do servizo.
Elena Candia destacou que Lugo debe ser un exemplo na defensa das persoas que coidan das familias e criticou que PSOE e BNG manteñan esta situación no SAF, pese a presentarse como defensores dos dereitos laborais.
O PP basea as súas peticións na Lei de Servizos Sociais de Galicia de 2008, que recoñece a competencia municipal na xestión do SAF e na participación na xestión das prestacións para garantir a autonomía persoal e a atención á dependencia, así como no Real Decreto do 16 de marzo de 2012, que establece a cofinanciación do servizo entre as administracións, obrigando á administración local a velar pola súa correcta prestación.