O PP lucense reclama no Senado a rehabilitación do mosteiro de Vilar de Donas
O PP de Lugo levará ao Senado o retraso do Goberno de Sánchez na rehabilitación do mosteiro de Vilar de Donas, en Palas de Rei, unha actuación prevista no Plan Turístico Nacional Xacobeo 2021-2022 á que se asignaban 1,5 millóns de euros e que o Ministerio de Industria e Turismo mantén actualmente bloqueada.
Os senadores populares José Manuel Barreiro, José Manuel Balseiro e Juan Serrano comprobaron o “mal estado de conservación” do inmoble durante unha visita á localidade, acompañados do alcalde, Pablo Taboada, e de veciños e veciñas da zona, cos que se comprometeron a trasladar formalmente esta reclamación ante o Executivo. Xa transcorreron tres anos desde o anuncio da obra sen que exista constancia da liberación dos fondos, a pesar de que xa existe un acordo co Bispado de Lugo.
O Plan Turístico Nacional Xacobeo 21-22, financiado con fondos europeos Next Generation, busca impulsar os Camiños de Santiago como produto cultural e patrimonial. Dentro deste proxecto, o mosteiro de Vilar de Donas e a súa igrexa románica anexa teñen un papel destacado, recibindo miles de visitantes.
“Tendo en conta que tanto o Bispado como os veciños e veciñas están a favor da súa recuperación, estamos ante un momento clave para actuar e garantir que as obras estean listas para o próximo Ano Santo Xacobeo 2027”, subliñan.
Neste contexto, os senadores presentarán unha pregunta escrita ao Goberno de Sánchez, solicitando explicacións e instando ao Ministerio de Industria e Turismo a cumprir coa partida económica prevista de 1,5 millóns de euros para a rehabilitación do mosteiro nas condicións do Plan Nacional Turístico Xacobeo 21-22.