O PP pide revisar o Plan Nacional da Anguía ante preocupacións sobre a súa xestión
Os senadores do PP por Lugo, José Manuel Barreiro, José Manuel Balseiro e Juan Serrano, reuníronse cos alcaldes e representantes municipais de Portomarín, Paradela, O Páramo e Guntín, co presidente da Federación Nacional de Confrarías de Pescadores, Basilio Otero, coa directiva da asociación de pescadores O Carrual e con hostaleiros locais para analizar a situación da anguía e o seu valor cultural e socioeconómico para a zona.
Todos coincidiron en que unha explotación responsable non debería prexudicar a especie e reclamaron medidas preventivas xunto cunha xestión rigorosa en lugar de prohibicións drásticas.
Neste marco, os senadores presentaron unha iniciativa que o Grupo Popular defenderá na Comisión de Pesca do Senado para instar ao Goberno a revisar o Plan de Xestión Nacional da Anguía. O obxectivo é garantir que calquera decisión sobre a conservación da especie se basee en criterios científicos contrastados, avaliacións reais de resultados e na diferenciación por concas hidrográficas.
A iniciativa parlamentaria propón non impulsar catalogacións estatais de máxima protección sen avaliar antes os plans autonómicos, revisar o Plan Nacional, instar ás comunidades autónomas a actualizar os seus plans, garantir análises científicas diferenciadas por conca, priorizar a recuperación de hábitats e combater o furtivismo e o tráfico ilegal, avaliar o impacto socioeconómico de calquera restrición e adoptar medidas de protección coherentes coa lexislación europea e cos modelos de xestión existentes.
Os populares alertaron de que o recente anuncio do Ministerio para la Transición Ecológica y el Reto Demográfico de incluír a anguía no Listado de Especies Silvestres en Réxime de Protección Especial na categoría de “En perigo de extinción” xerou preocupación en Galicia, onde se aplican modelos de xestión rigorosos, con control do esforzo pesqueiro, seguimento científico e loita contra o furtivismo. Destacaron que o reto é compatibilizar a protección das especies e a conservación do medio mariño coa viabilidade económica e social do sector, preservando emprego, tradicións e tecido produtivo local.
Os informes científicos recentes, tanto do Plan español de primavera de 2025 como do Consejo Internacional para la Exploración del Mar, sinalan que non se acadaron totalmente os obxectivos, pero en ningún caso impoñen prohibicións xeneralizadas como única medida. Os senadores insisten en que unha conservación eficaz require diferenciar entre modelos que funcionan e os que non, evitando decisións uniformes que non se axusten á realidade biolóxica, ambiental e socioeconómica de cada conca.
Os senadores conclúen que a recuperación da anguía debe basearse no reforzo das medidas eficaces, na cooperación institucional e no respecto á experiencia acumulada polos territorios que demostraron capacidade de xestión responsable e sostible.