O PP pide un pleno extraordinario para aclarar o modelo de contadores de auga en Lugo
O Grupo Municipal do Partido Popular solicitou a convocatoria dun pleno extraordinario urxente para que o goberno local aclare de forma inmediata que tipo de contador de auga deben instalar os lucenses ou se procede verificalo antes do 24 de outubro, conforme á normativa estatal (Orde ICT/155/2020 sobre Control Metrolóxico).
O PP lembra que os contadores con máis de 12 anos deben ser substituídos antes desa data e critica que, desde 2020, o Concello nunca tivo vontade de modernizar o servizo, limitándose a subir impostos sen mellorar a calidade.
Os populares denuncian a actuación “irresponsable” do Goberno local do Concello de Lugo, que primeiro enviou cartas advertindo de posibles sancións, logo recomendou agardar á resolución dos fondos PERTE, a cal xa fora denegada o 6 de agosto, xerando confusión entre a cidadanía e os profesionais do sector.
O PP tamén puxo o foco nun informe interno da Xefa do Servizo de Augas, que revela o colapso do departamento encargado das altas, baixas e incidencias: cinco prazas vacantes sen cubrir, máis de 600 solicitudes pendentes, 100 cambios de contador sen tramitar e máis de 200 lecturas sen rexistrar. Esta situación afecta á facturación municipal e impide informar correctamente a Augas de Galicia das perdas de auga, o que podería derivar en sancións.
Ante este escenario, a voceira do Grupo Municipal, Elena Candia, e a concelleira Silvia Colmenero reclaman a posta en marcha dun Plan Integral de Mellora da Xestión do Ciclo da Auga que inclúa a definición de modelos homologados de contadores, licitación urxente das ETAP e EDAR, reforzo do persoal municipal, servizo de reparación 24/7, control de fugas, renovación de tubaxes, abastecemento rural, limpeza de fosas sépticas e activación do sistema de reutilización de auga depurada.