O PP preguntará na Deputación pola apertura do aparcadoiro de Santa María
O aparcadoiro do Fogar de Santa María segue pechado a todos os lucenses a pesar de que en abril deste ano, PSOE e BNG na Deputación de Lugo aprobaron un decreto no que establecían as instrucións sobre o uso do aparcadoiro das chairas 1 e 2 do complexo de Santa María, con acceso desde Rolda dá Muralla e Rúa Chantada, respectivamente. Unha “instrución que establece as regras para ordenar o estacionamento nas chairas 1 e 2 do complexo de Santa María de titularidade provincial sen prexuízo do resto de facultades que sobre o tráfico e fóra desta ostenten as demais administracións”, trasladan dende o PP.
Unha instalación moi necesaria na cidade debido á falta de prazas de estacionamento “polo que todas as prazas que se poidan xerar son positivas de cara a mellorar a circulación”. En febreiro de 2022, os grupos do BNG na Deputación e no Concello anunciaron a apertura deste aparcadoiro para, ás poucas horas, José Tomé pechalo por decisión propia “creando así unha nova división entre os grupos de goberno en ambas administracións”.
Tralo peche do aparcadoiro, o propio presidente da Deputación anunciaba a súa próxima apertura para o mesmo ano 2022, pero a realidade é que no verán de 2024 aínda non se abriu. As obras de acondicionamento deste aparcadoiro remataron en setembro do ano pasado, uns traballos envoltos en polémica que desembocaron en propostas de sanción á propia Deputación e a un funcionario provincial.
No referente á entidade provincial, propúxose unha sanción de 2.000 euros pola tala das árbores do Fogar de Santa María, mentres que no referente ao funcionario a proposta de sanción foi de 6.000 euros ao funcionario por vetar a entrada aos axentes de Medio Ambiente, por orde expresa da presidencia da Deputación. Dende que remataron os traballos de acondicionamento, aseguran que o aparcadoiro do Fogar de Santa María só abre en horario de oficina de luns a venres, incumprindo así o establecido no propio decreto aprobado pola Deputación no mes de abril.
“En horario de mañá emprégase para que aparquen os funcionarios provinciais, pero é imposible de entender que polas tardes se poña o candado e ninguén poida entrar a pesar de estar ao carón do centro, unha zona comercial na que se precisan prazas de aparcamento próximas para que os lucenses poidan realizar as súas compras, a pesar de que anunciaron a súa apertura hai dous anos, teñen o regulamento de uso aprobado dende hai meses”, sinalaron, e engadiron que “so falta abrir a porta”.