O PP presenta emendas aos orzamentos de 2026 ao considerar que poñen en risco os servizos públicos
O Partido Popular deu un paso máis no proceso de mellora dos Orzamentos municipais de 2026 presentados polo goberno local do PSOE e BNG, unhas contas que, segundo sosteñen, non contan co seu apoio ao considerar que comprometen o futuro dos servizos públicos e evidencian unha xestión económica deficiente.
Os populares alertan de que o proxecto orzamentario supera os gastos correntes aos ingresos en preto de 10 millons de euros, incrementa a débeda viva en máis de 40 millons de euros e contempla investimentos financiados integramente con préstamo por un importe de 18 millons de euros, ao tempo que continúa medrando o gasto discrecional ou non obrigatorio, tal e como recolle o informe de intervención. A este respecto, sinalan que unhas contas con estas características suporían o cesamento inmediato dos responsables en calquera empresa privada.
Desde o grupo popular explican que as emendas presentadas teñen como obxectivo mellorar a vida nos barrios, reforzar a seguridade, a saúde e os servizos públicos, así como corrixir deficiencias detectadas no documento inicial. Entre as propostas inclúese a modificación das bases de execución orzamentaria para permitir anticipos de pagamento nas subvencións destinadas a entidades sen ánimo de lucro, co fin de facilitar o seu funcionamento.
As emendas tamén recollen actuacións que xa foran comprometidas e aprobadas previamente en pleno municipal, como a execución do saneamento na rúa Fermín Rivera aproveitando as obras previstas na zona, ou a garantía dun acceso seguro para que os nenos e nenas poidan chegar ao colexio no barrio das Gándaras.
Neste último caso, o PP solicita unha partida específica para construír unha beirarrúa ou senda peonil na Virxe da Soidade, unha demanda histórica tanto da comunidade educativa como da veciñanza. Así mesmo, propoñen un plan de aparcadoiros que inclúa a creación dun novo estacionamento en Fontiñas, no barrio do Carme, así como o estudo doutros posibles emprazamentos na contorna do centro urbano, como a rúa Castelao. No ámbito fiscal, reclaman a bonificación do IBI e a eliminación da plusvalía para os propietarios de terreos afectados polos cambios de cualificación nas áreas de expansión, que actualmente están a tributar como solo urbano sen posibilidade de edificar.
Pensando nas persoas e na conciliación da vida laboral e familiar, os populares formulan partidas para a redacción do proxecto de servizos de conciliación nos polígonos industriais do Ceao e das Gándaras, así como a adhesión ao convenio marco da FEGAMP que permite o uso das instalacións deportivas dos centros educativos fóra do horario lectivo, ampliando así a dispoñibilidade de espazos para o adestramento. Do mesmo xeito, propoñen impulsar o Plan Local de Saúde Mental e mellorar as instalacións da Escola Infantil Gregorio Sanz.
No eido da rehabilitación urbana e da cohesión entre barrios, o PP defende destinar parte das partidas do Plan Municipal de Vivenda á rehabilitación de inmobles e ao fomento do alugueiro nos barrios da Milagrosa e Feijóo, ademais de garantir conexións seguras entre distintas zonas da cidade, como a construción dunha beirarrúa na Estrada Vella de Santiago que comunique A Ponte co cemiterio de San Froilán. Tamén apostan pola mellora da rede de centros sociais, onde detectan carencias en accesibilidade, seguridade e mantemento, así como polo incremento das partidas de emerxencia social e de apoio ás entidades do ámbito social. Xunto a isto, propoñen que parte dos fondos previstos para a renovación da rede de saneamento se destinen á execución do saneamento de Esperante.
Entre as emendas figura igualmente a solicitude de incrementar a partida destinada á asociación Michos, polo labor que desenvolve no coidado, protección e prevención de problemas de saúde pública relacionados cos gatos comunitarios. Ademais, o grupo popular reclama a creación dunha partida xenérica no capítulo I de gasto de persoal para reforzar a contratación de persoal interino ata a cobertura definitiva das prazas.
Os populares realizaron estas consideracións tras comprobar que nos orzamentos de 2026 non se inclúe ningunha partida para proxectos anunciados polo goberno local, como a posta en marcha dunha área de atención ás persoas migrantes, a redacción da cidade deportiva de Sanfiz ou a adaptación das Caldas para novos usos, aos que se suman outras iniciativas anunciadas que tampouco contan con dotación económica.