O PP presenta un decálogo para mellorar o transporte urbano en Lugo
O Partido Popular presentou un decálogo de propostas co obxectivo de mellorar o transporte urbano en Lugo e ofrecer un servizo útil, fiable e adaptado ás necesidades reais da cidadanía. Entre as medidas destacan coidar aos traballadores e respectar os seus dereitos laborais, a recuperación das antigas liñas 2, 7, 7A e 12, a integración das rutas en Google Maps, a creación dunha aplicación móbil, a posta en funcionamento das pantallas solares en paradas, a mellora da información nos dípticos, a garantía de autobuses accesibles, o pago con tarxeta, bonificacións de ata o 100 % para menores de 18 anos, xubilados, pensionistas e familias con escasos recursos, e a renovación de vehículos máis sostibles.
Segundo os populares, desde o Goberno local pasouse de presumir do récord mensual de usuarios a recoñecer que as liñas precisaban reformarse, unha situación que o PP xa advertira dende hai tempo. Ademais, destacan que o servizo resulta barato para quen o utiliza, pero caro para quen non, xa que a maior parte do custe —case 2,7 millóns de euros en 2024— correspóndese a financiamento público, mentres que a recadación por billetes foi de apenas 175.000 euros.
Os datos da comisión de queixas confirman a necesidade das medidas propostas, xa que moitas das reclamacións mensuais se refiren a atrasos constantes, frecuencias insuficientes, falta de información e problemas de accesibilidade. O PP subliña que o problema de fondo é o modelo actual, recoñecido tamén polo propio Plan de Mobilidade Urbana Sostible, que indica que só o 4,8 % dos desprazamentos na cidade se realizan en transporte público e que a oferta está lonxe de ser competitiva.