O PP reafirma o seu compromiso coa Milagrosa e insiste en medidas para garantir a seguridade na rúa Tui
O Partido Popular de Lugo volveu manifestar publicamente o seu apoio ao barrio da Milagrosa e reiterou a necesidade de adoptar medidas eficaces para asegurar a convivencia e a seguridade na rúa Tui e na súa contorna. A formación lembra que xa o 7 de xullo de 2025 reclamara actuacións inmediatas e subliña que continuará insistindo ata lograr solucións, ao tempo que valora presentar unha iniciativa no vindeiro pleno municipal.
No centro da polémica atópase o establecemento “Las Palmeras”, situado no número 6 da rúa Tui, que segundo os populares acumula durante anos actuacións policiais, inspeccións técnicas e queixas veciñais que evidencian diversas infraccións administrativas e unha actividade que, ao seu xuízo, non se axusta á licenza concedida. O PP sostén que o local estaría funcionando na práctica como pub ou espazo nocturno sen a correspondente autorización, aproveitando o horario ampliado propio dos café-bar para desenvolver unha actividade máis próxima á dun after.
A cronoloxía dos feitos, segundo detallan, arrinca o 29 de xuño de 2025 cunha acta de inspección. O 2 de xullo constan informes tanto da Policía Local como da Policía Nacional. O 7 de xullo o Partido Popular reclama unha intervención inmediata, mentres que o 1 de setembro comparece novamente para abordar a situación de seguridade. O 12 de setembro entréganse as sinaturas recollidas entre a veciñanza e non é ata o 28 de outubro cando se incoa o expediente sancionador, publicándose a resolución no BOE do 29 de xaneiro, tal e como figura no informe asinado o 19 de febreiro por Rubén Arroxo.
Os populares cuestionan que, malia existir actas que acreditaban diferentes incumprimentos xa a finais de xuño, o goberno local non actuase ata meses despois e vinculan a apertura do expediente á presión exercida pola oposición e pola mobilización veciñal. Ademais, poñen o foco en que, segundo as actas policiais ás que tiveron acceso, se produciron múltiples intervencións que poderían ter derivado en expedientes sancionadores diferenciados.
En concreto, sinalan que as oito intervencións recollidas nos expedientes 233 e 234 poderían ter dado lugar a oito procedementos independentes, un por cada acta. Porén, o executivo municipal optou por agrupar as actuacións en dous únicos expedientes, unha decisión que, segundo o PP, ten consecuencias xurídicas directas. A formación lembra que a Lei 10/2017 de Espectáculos Públicos de Galicia establece que existe reincidencia cando se produce máis dunha infracción da mesma natureza con resolución firme no prazo dun ano, e que a acumulación de dúas ou máis infraccións graves firmes nun mesmo período pode derivar na cualificación de moi grave da seguinte.
Nese suposto, a normativa contempla medidas como a clausura do local, a suspensión da actividade ou mesmo a revogación da licenza. Por iso, os populares consideran que, de existir xa sancións graves firmes publicadas e manterse os incumprimentos, a análise da reincidencia debe realizarse con rigor. Ao seu entender, se cada intervención dera lugar ao seu propio expediente e á correspondente resolución firme, a reiteración quedaría formalmente individualizada, facilitando a apreciación desa reincidencia.
O Partido Popular insiste en que non se trata dunha cuestión partidista, senón do cumprimento dunha obriga legal para salvagardar a convivencia, a seguridade, a saúde e o dereito ao descanso da veciñanza da rúa Tui. Lembran que os feitos estaban documentados a finais de xuño e que se podería ter actuado daquela, polo que conclúen que a resposta chegou tras meses de presión política e social.