O PP reclama ao Concello que faga de forma subsidiaria a cuberta dunha casa
Os populares explican que as persoas que residen neste inmoble viven nunhas condicións insalubres indicando que esta situación tamén afecta aos bloques de vivendas colindantes que presentan humidades e advirten do risco de desprendementos de cascotes cara a vía pública.
O grupo municipal popular fixo pública a súa petición de que o Concello execute de forma subsidiaria a cuberta dun edificio da Avenida da Coruña que leva dúas décadas sen ela.
Dende o PP manifestan a súa preocupación polo "pasotismo" do goberno diante deste caso “se ben os problemas de filtracións empezaron no ano 2000, a situación agravouse en marzo de 2022 en vez de reparar a cuberta para solucionar os problemas de filtracións de auga a retiraban por completo”.
Segundo explican, as persoas que residían no segundo andar víronse obrigadas a abandonar o seu fogar, e no primerio as condicións son paupérrimas con desconchados e humidades en todos os cuartos convertido este espazo nun lugar insalubre e inhabitable.
A situación na que está este inmoble ademáis de afectar ás persoas que viven no edificio, está a supor un risco para os peóns polos desprendementos de cascallos á vía pública poñendo en perigo a peóns e vehículos.
O concelleiro popular Antonio Ameijide considera que o goberno local non está actuando con contundencia xa que “a pesar dos sucesivos requerimentos a administración local, limitouse a impoñer multas coercitivas para cubrir o expediente sen dar unha solución ás familias afectadas”.
Por este motivo o Grupo Popular presentará un rogo para que o Concello execute de forma subsidiaria a cuberta do número 24 dun inmoble da Avenida de A Coruña.
Hai que ter en conta que este edificio o tellado e o dereito de voo pertence aos donos do terceiro andar por iso non pode actuar a comunidade e así figura na escritura.
A administración municipal pode e debe acudir á execución subsidiaria tal e como se contempla na lexislación vixente para dar cumprimento e garantir o deber dos propietarios de conservación das súas propiedades, xa que o Concello, entre as suas competencias, debe velar para que as edificacións cumpran unhas mínimas condicións de seguridad, salubridade, estética, etc.