O programa de reparto de alimentos saudables chega a 297 centros galegos no curso 2025/2026
A conselleira do Medio Rural, María José Gómez, visitou o IES do Camiño, en Palas de Rei, un dos centros educativos que participan no programa de distribución de froita fresca, leite e castañas impulsado polo seu departamento. Durante a visita, na que estivo acompañada polo alcalde da localidade, Pablo Taboada, a conselleira subliñou que o propósito desta iniciativa é fomentar o consumo de produtos saudables entre a infancia e a mocidade, co obxectivo de consolidar hábitos alimentarios que poidan manter ao longo da súa vida adulta.
Para o curso 2025/2026 habilitouse unha liña de axudas específica, dotada con algo máis dun millón de euros, á que poden optar todos os centros escolares de Galicia, incluíndo a educación secundaria obrigatoria, o bacharelato e a formación profesional de grao medio. Grazas a esta convocatoria, os centros seleccionados dispoñen de dous períodos de distribución: o primeiro esténdese ata febreiro de 2026 e o segundo desenvólvese entre marzo e xuño. En cada unha destas quendas, a froita e as castañas repártense durante 10 días lectivos consecutivos, mentres que o leite se distribúe un mínimo de 10 días.
Nesta edición do programa están a participar 297 centros de toda Galicia, o que se traduce en arredor de 80.000 estudantes beneficiados. A conselleira destacou que, só na provincia de Lugo, participan 38 centros, o que permite achegar estes alimentos saudables a uns 7.500 nenos e mozos lucenses.