O programa “Eu xogo como unha muller” 2025 achegou o tenis de mesa ao CEIP As Mercedes
O Club Deportivo Dez Portas Lugo TM levou a cabo unha actividade de promoción e difusión do tenis de mesa no marco do programa “Eu xogo como unha muller” 2025, unha iniciativa concedida pola Real Federación Española de Tenis de Mesa a través da súa Comisión de Muller e Tenis de Mesa. A acción estivo orientada especificamente á captación de deportistas femininas en idade escolar e desenvolveuse no CEIP As Mercedes.
Na actividade participaron tres membros do club, o adestrador Cláudio Mendes, o xogador Miguel López e a xogadora e monitora Ana Belén Fernández Cortiñas, que se desprazaron ao centro educativo para realizar unha promoción que se prolongou arredor dunha hora por cada aula, cun total de tres clases participantes. Todas as sesións tiveron lugar no ximnasio do colexio.
A xornada comezou cunha charla introdutoria na que se explicaron os conceptos básicos do tenis de mesa e se incidiu na importancia de fomentar a práctica deportiva entre as mulleres, destacando as características desta disciplina e os valores positivos asociados ao deporte. A continuación, proxectouse un vídeo explicativo que serviu de apoio para que o alumnado puidese formular preguntas e resolver dúbidas.
Posteriormente, a actividade trasladouse ás mesas de xogo. Nun primeiro momento realizouse unha demostración por parte dos integrantes do club e, a continuación, repartíronse raquetas e pelotas a todo o alumnado para levar a cabo exercicios de adaptación fóra da mesa. Cada neno e nena tivo a oportunidade de xogar algúns puntos tanto co adestrador como coa xogadora do club, finalizando a sesión con xogos por equipos.
A actividade concluíu cunha sesión de fotografías conxuntas e cun espazo de socialización no que se intercambiou información sobre o club e os horarios de adestramento, pechando así unha xornada centrada na promoción do deporte e na igualdade de oportunidades no ámbito deportivo.