O programa 'Un gusto de rural, un rural de gusto' estará presente na Festa de Pascua de Sobrado de Picato
O programa de promoción de produtos de razas autóctonas 'Un gusto de rural, un rural de gusto', impulsado pola área de Rural da Vicepresidencia da Deputación de Lugo, participará na Festa de Pascua de Sobrado de Picato, en Baralla, que se celebrará durante este fin de semana.
A festa, organizada pola Asociación de Veciños, terá lugar entre o venres 18 e o domingo 20 de abril, destacando especialmente a xornada final do domingo, onde os asistentes poderán degustar gratuitamente diversas elaboracions elaboradas con carne de vacún das razas autóctonas Cachena e Frieiresa.
Durante a xornada do 20 de abril, ofreceranse croquetas e mini hamburguesas elaboradas con carne de vacún destas razas, un produto de calidade que se preparou grazas á colaboración de Boaga (Federación Galega de Razas Autóctonas) e gandeiros locais. As carnes utilizadas foron proporcionadas por José Rodríguez Teijeiro, criador de Frieiresa no municipio de Begonte, e Montserrat Calvo Iglesias e Manuel Doval Díaz, da gandería "Cachenas O Antoxo" do municipio do Corgo.
O deputado de Rural, Daniel García, presentou esta actividade xunto a representantes de Boaga, os criadores implicados e membros da Asociación de Veciños, durante un acto no que subliñou a importancia de eventos como este para promocionar os produtos de razas autóctonas.
García destacou que "estas festas populares son unha oportunidade para promocionar os produtos de razas autóctonas, carne de primeira calidade das ganderías da provincia", e lembrou que "consumir estes produtos é unha forma de contribuír colectivamente á viabilidade das granxas e ao futuro dun sector fundamental para a conservación do territorio e a fixación de poboación no rural".
Este evento non só ofrecerá unha degustación de produtos locais, senón que tamén servirá para dar visibilidade ao traballo das ganderías de razas autóctonas e ao seu impacto na economía local e no mantemento do medio rural.