O PSdeG de Baleira critica a inacción do goberno local ante os problemas de sinal da TDT
O Grupo Municipal Socialista de Baleira denunciou a falta de actuación do goberno local do Partido Popular fronte ás graves deficiencias que arrastra o sinal da Televisión Dixital Terrestre (TDT), que continúa chegando con mala calidade a numerosos fogares do concello.
O voceiro socialista, José Tellado, lembrou que a cuestión xa fora trasladada ao pleno no mes de abril e advertiu de que, a día de hoxe, o executivo local segue sen dar unha resposta. Segundo indicou, o Concello ten a competencia de garantir o bo funcionamento deste servizo, pero a inacción do goberno obrigou ao PSdeG a dar un paso adiante.
Nesta liña, o grupo socialista mantivo contacto coa empresa responsable, que achegou información técnica sobre as dificultades existentes e as alternativas dispoñibles para mellorar a cobertura. Tellado asegurou que se está traballando para reparar as antenas canto antes e que a veciñanza dispoña dun sinal en condicións.
Os socialistas subliñan que o acceso a unha TDT de calidade é un servizo básico que o Concello non pode desatender. Por iso, comprométense a seguir traballando ata acadar unha solución definitiva e instan ao PP a asumir de inmediato as súas responsabilidades. “Mentres eles calan, nós buscamos solucións para a veciñanza”, concluíu Tellado.