O PSdeG de Lugo rendeu homenaxe a Isabel Rodríguez nun acto que reuniu máis dun cento de persoas
A Executiva Provincial do PSdeG-PSOE na provincia de Lugo celebrou este sábado un acto de recoñecemento a Isabel Rodríguez, nunha convocatoria na que representantes do ámbito político, institucional e da sociedade civil quixeron acompañala e agradecer o traballo desenvolvido durante os anos en que estivo á fronte da Subdelegación do Goberno en Lugo.
A cita, aberta ao conxunto da cidadanía e da sociedade civil lucense, congregou a máis de cen persoas. Entre os asistentes participaron cargos orgánicos e institucionais do partido, entre eles o Secretario Xeral do PSdeG na provincia e Presidente da Deputación, José Tomé Roca; Pilar García Porto; Lara Méndez; o senador César Mogo; a deputada Patricia Otero; a actual Subdelegada do Goberno en Lugo, Olimpia López; e o alcalde de Lugo, Miguel Fernández. Tamén acudiron compañeiras e compañeiros socialistas, voceiras e voceiros municipais, xunto con alcaldes e alcaldesas da provincia.
No seu discurso, José Tomé Roca trasladou palabras de gratitude pola traxectoria pública de Isabel Rodríguez, lembrando o seu labor como concelleira en Viveiro e o seu paso pola Subdelegación do Goberno, sempre —dixo— cun marcado sentido da responsabilidade e cun compromiso firme co servizo público.
Pola súa parte, unha emocionada Isabel Rodríguez agradeceu o acto promovido pola Executiva Provincial e subliñou que tivo “a honra de representar un Goberno socialista nun territorio que durante moito tempo permaneceu á marxe das prioridades estatais”. Dirixiuse tamén a José Tomé para agradecerlle “o respaldo permanente e a confianza durante todos estes anos”.
Rodríguez fixo extensivo o agradecemento ao persoal da Subdelegación do Goberno polos sete anos de traballo compartido, así como ás forzas e corpos de seguridade do Estado —Policía Nacional, Garda Civil e Policía Local— pola súa cooperación cotiá. Recoñeceu igualmente o apoio de alcaldes, voceiros, secretarios xerais e militancia socialista da provincia, ademais do seu equipo de comunicación e das amizades que asistiron ao encontro. Tamén lembrou aos delegados e delegadas do Goberno cos que coincidiu durante a súa etapa institucional.
Para concluír, lanzou un chamamento á unidade interna no partido: “Debemos permanecer unidas e unidos e avanzar xuntos, porque sabemos perfectamente o que temos enfronte. Se ao Partido Socialista lle vai ben, tamén lle irá mellor ás veciñas e veciños da provincia de Lugo”.
Entre o público atopábanse tamén representantes de colectivos e entidades sociais e económicas, como a CEL, a Federación Galega de Comercio, a Federación de Asociacións Veciñais, a Asociación Provincial de Empresarios de Hostalería e a Confederación Hidrográfica Miño-Sil. Tamén participaron a Presidenta da Audiencia Provincial, Sandra Piñeiro; o xefe da Policía Local, José Manuel Río Espiño; o comisario da Policía Nacional, Luis Miguel Romera; o inspector xefe da Policía Nacional de Viveiro, Guillermo Brao; o ex-xefe da Policía Local, Jesús Piñeiro; o Presidente de APREVAR, Luis Abelleira; a xuíza Susana Vázquez; e o Presidente da CHMS, José Antonio Quiroga.