O PSOE de Baralla denuncia que o PAC funcionou en decembro cunha soa médica sen substitucións
O PSdeG de Baralla denunciou que o Punto de Atención Continuada (PAC) do municipio estivo operativo durante todo o mes de decembro cunha única médica, debido a que o Sergas non cubriu as ausencias do facultativo titular. Segundo explican desde o grupo socialista, esta situación obrigou á profesional a asumir en solitario toda a actividade asistencial do servizo, incluíndo consultas ordinarias, atención de urxencias, saídas a domicilio e tamén os cupos correspondentes aos outros médicos, afrontando xornadas moi prolongadas e sen ningún tipo de reforzo.
Desde o PSdeG subliñan que a falta de persoal derivou nunha sobrecarga asistencial que cualifican de extrema, chegando a producirse xornadas nas que a única médica tivo que atender entre setenta e oitenta pacientes. Para os socialistas, trátase dunha situación “absolutamente inasumible e perigosa”, tanto para a propia profesional como para a veciñanza que depende deste servizo sanitario.
O voceiro socialista, Jaime González, lembrou que ao concello de Baralla lle corresponden tres médicos, xa que se trata dun municipio cunha poboación moi envellecida e moi dispersa, factores polos que o propio Sergas o considera unha zona de especial dificultade. González advertiu de que “traballar cun 33% do persoal necesario deixa aos profesionais exhaustos e aos veciños sen o servizo polo que pagan cos seus impostos”.
Desde o PSdeG reclaman que se garantan as substitucións inmediatas do persoal sanitario sempre que se produzan baixas e que se repoña o terceiro médico que lle corresponde ao municipio. Ademais, González criticou que, “cun goberno local de dez concelleiros sobre once, o alcalde sexa incapaz de garantir servizos básicos nin de facer valer o seu peso dentro do Partido Popular para defender os intereses de Baralla”.