O PSOE de Palas rexistra unha moción pola defensa do territorio relativa ao proxecto de Altri
![Ana Corredoira PSOE Palas](https://lugoxa.com/wp-content/uploads/2023/05/Ana-Corredoira-PSOE-Palas.jpg)
No último pleno do Concello de Palas de Rei, un dos puntos da orde do día ocupábao a moción rexistrada polo Grupo Municipal Socialista pola defensa do territorio que analiza a problemática ligada ao proxecto polo que Altri pretende instalar no concello unha macrocelulosa. Os socialistas propoñen un acordo con 3 puntos fundamentais, para instar á Xunta a cumprir cos compromisos europeos en materia de conservación de hábitats e protección da biodiversidade e retomar o traballo de ampliación dos espazos protexidos incluídos en Rede Natura 2000.
Tamén piden desenvolver normativas a favor da saúde ambiental, aliñadas cos obxectivos comunitarios en materia de desenvolvemento sostible, e defender os recursos, o noso tecido socioeconómico e a nosa calidade de vida fronte aos intereses económicos das industrias contaminantes que poñen en risco a sostibilidade social, económica e ambiental do noso territorio. Este acordo contou cos 8 votos en contra dos edís do grupo municipal popular.
Dende o grupo municipal socialista téñeno claro. “Fronte a un modelo industrial depredador dos recursos que configuran a nosa paisaxe, o noso territorio, amosamos o noso rexeitamento” e a “urxencia de abordar dende a política e o debate público cuestións como o modelo territorial que queremos”. E isto, “procurando un modelo de progreso e desenvolvemento integrador, rexenerador e sostible”.
Na mesma sesión preguntáronlle ao executivo local para confirmar, segundo asegura, que dende o Concello non se formulou ninguna alegación ou enmenda ao proxecto. En materia económica, presentouse en pleno a documentación correspondente ao expediente relativo á Conta Xeral do 2023. Unha abstención tamén motivada pola dinámica económica do executivo local, cuxa responsabilidade de redistribución dos recursos de forma obxectiva e planificada “vén limitada pola prorrogación dos orzamentos”. Isto implica o uso dunha ferramenta de xestión “desactualizada” que non recolle debidamente as necesidades do concello e obriga a realizar continuas modificacións de crédito para atender as necesidades, aseguran.