O relevo mixto 4x100 estilos do Club de Natación PortaMiñá conseguiu o récord galego absoluto
O Club Natación PortaMiñá de Lugo asinou unha destacada actuación no Gran Campionato de España Open e Junior celebrado en Sabadell, onde os seus nadadores e nadadoras acadaron un total de catro medallas e numerosas finais, consolidando o alto nivel competitivo do equipo lucense no panorama estatal.
Sofía Mourenza foi unha das grandes protagonistas do campionato, demostrando que é unha das mellores nadadoras do Estado non só nas probas de braza, senón tamén nas de estilos. A moza nadadora colleitou tres medallas de bronce na categoría Junior: nos 100 metros braza, 200 metros braza e 200 estilos. Ademais, foi quinta nos 400 estilos Junior e sétima nos 50 metros braza, confirmando a súa versatilidade e excelente rendemento en diferentes disciplinas.
Tamén destacou Inés Mourenza, que volveu demostrar a súa calidade en cada unha das probas nas que competiu. Inés conseguiu a medalla de prata nos 200 metros bolboreta e acadou unha meritoria sétima posición na categoría Absoluta desta mesma proba. Así mesmo, foi quinta nos 1500 metros libres e nos 800 metros libres en categoría Junior, ademais de ocupar o posto 14 na clasificación Absoluta dos 800 libres. O seu brillante desempeño valeulle a convocatoria para unha concentración de adestramento co equipo nacional junior de Augas Abertas, que terá lugar do 18 ao 21 de marzo no Centro Nacional de Málaga.
Outro dos fitos do campionato foi o récord galego absoluto conseguido no relevo mixto 4x100 estilos, integrado por Martín Vázquez, Sofía Mourenza, Inés Mourenza e Brais Novo. Este logro reflicte o excelente nivel do equipo e a coordinación entre os seus integrantes.
Na categoría Absoluta, Martín Vázquez volveu destacar nas probas de velocidade. Finalizou décimo nos 50 metros bolboreta e ocupou a décimo cuarta posición nos 100 metros costas, confirmando a súa regularidade nas competicións de alto nivel.
Pola súa parte, Brais Novo realizou un gran campionato en todas as súas probas. Nos 100 metros braza quedou a tan só unha décima do récord galego absoluto, rematando en undécima posición. Tamén acadou o posto 17 nos 50 metros braza, nunha categoría Absoluta cada vez máis competitiva.
O Club Natación PortaMiñá de Lugo pecha así unha actuación sobresaínte neste Campionato de España, reafirmando a súa presenza entre os clubes máis destacados do panorama estatal e demostrando que o traballo constante e o compromiso coa excelencia seguen dando grandes froitos.