O San Froilán 2024 suma un novo concerto ao seu programa
Continúan a desvelar o programa do San Froilán 2024, que confirma un novo concerto. A cantante María Rodés únese á programación das patronais este ano. A artista catalana presentará o seu espectáculo "Canta Copla" o martes, 8 de outubro, ás 21.00 horas na Praza de Santa María, dentro da súa xira de celebración do 10º aniversario do álbum que a consolidou no panorama musical.
María Rodés, recoñecida pola súa voz doce e o seu estilo único que fusiona canción de autor coa experimentación sonora, ofrecerá unha homenaxe ao xénero da copla española. No seu álbum "Canta Copla", lanzado en 2014, Rodés reinterpretou clásicos como "Tatuaje", "El día que nací yo" e "Tres puñales", levándoos ao seu terreo artístico cunha nova perspectiva.
Esta actuación únese a unha programación que polo momento contará con artistas como Fillas de Cassandra, La Perra Blanco, Dollar Selmouni, Club del Río e Triángulo de Amor Bizarro. Rodés, con máis dunha década de carreira e colaboracións con artistas como Jorge Drexler e David Byrne, achegará ao público lucense unha proposta innovadora dentro da gran festa do outono galego.