O Vello Cárcere acollerá un acto informativo promovido por Mariña Patrimonio e ADEGA
As asociacións Mariña Patrimonio e ADEGA organizan un acto informativo o xoves 3 de abril ás 20.00 horas no Vello Cárcere de Lugo para tratar a problemática dos 101 xacementos arqueolóxicos afectados por intervencións forestais documentados nos anos 2024 e 2025 na provincia de Lugo.
A concentración de danos na zona centro da provincia pon de manifesto a falta de control e a impunidade das empresas forestais, que, a pesar das evidentes consecuencias, continúan as súas actividades sen respectar o patrimonio arqueolóxico. As asociacións denuncian que as labores de plantación de especies como o eucalipto e o piñeiro, xunto co paso de maquinaria pesada e a apertura de vías de saca, están causando danos graves, e en moitos casos, a destrución de bens patrimoniais protexidos.
Mariña Patrimonio e ADEGA identificaron ao longo do ano 2024 e principios de 2025 un total de 101 xacementos afectados, dos cales 80 foron danados pola plantación de eucaliptos, 19 por piñeiros e 2 por outras causas. Estas intervencións, que inclúen o paso de maquinaria pesada e a preparación do terreo para as plantacións, afectan directamente as estruturas e estratos arqueolóxicos, provocando a súa alteración ou destrución progresiva.
No acto, intervirán Manuel Miranda, presidente de Mariña Patrimonio, e Xosé Manuel Rodríguez, membro de ADEGA, quen explicarán os traballos realizados, os métodos empregados para identificar os danos e as medidas que se solicitaron á Dirección Xeral de Patrimonio Cultural para frear a destrución do patrimonio arqueolóxico na zona.
Este acto está aberto a todas as persoas interesadas en coñecer mellor a situación do patrimonio arqueolóxico en Galicia e as accións necesarias para protexelo fronte ás intervencións forestais incontroladas.