O Vello Cárcere acolleu a presentación do número 91 da Revista Galega de Educación
O Vello Cárcere acolleu a presentación do número 91 da Revista Galega de Educación, que leva por título 'Comunidade e participación das infancias', e do libro Realidades e Horizontes da Educación en Galicia.
O acto, que destacou a relevancia da educación en Galicia, contou coa participación de distintas personalidades do ámbito educativo e foi conducido por por Iria Buide, edil responsable de Educación e Difusión do Coñecemento do Concello de Lugo, quen destacou a importancia do traballo realizado ao longo dos anos na educación galega. A moderación correu a cargo de Santiago Quiroga, mestre e integrante de Nova Escola Galega.
A presentación do número 91 da Revista Galega de Educación estivo a cargo de Ana Parada e María Barba, quen puxeron en valor o contido deste número, centrado na comunidade educativa e na participación das infancias.
A revista, que iniciou a súa andaina en 1986 cunha periodicidade trimestral, segue a ser un referente na análise e difusión das políticas educativas en Galicia. Ao longo dos anos, a publicación foi gañando un importante número de subscritores, alcanzando a cifra de 450 ao final de 1988, con 700 exemplares distribuídos en cada número.
Pola súa parte, o libro Realidades e Horizontes da Educación en Galicia, que se presentou no evento, foi obra dos catedráticos Xesús Rodríguez, da Universidade de Santiago de Compostela (USC), e Antón Costa, catedrático de Historia da Educación.
Ambos os autores expuxeron as principais ideas e investigacións do libro, que ofrece unha análise profunda e especializada sobre o desenvolvemento educativo na comunidade galega.
Este traballo tamén serve como homenaxe á traxectoria docente e investigadora de Antón Costa, quen, ao longo de máis de catro décadas, desempeñou un papel fundamental na docencia universitaria e na xestión institucional.
Tanto o libro como a revista son reflectores do compromiso coa mellora da educación en Galicia e un xeito de seguir rindo tributo ao traballo de todos os profesionais do sector.