O XXII Torneo Cidade de Lugo de Xadrez reunirá aos mellores xogadores Sub 2400
Lugo volverá converterse nun punto de referencia do xadrez galego coa celebración do XXII Torneo Cidade de Lugo de Xadrez Sub 2400, que terá lugar os días 10 e 11 de maio.
O torneo, oganizado por Xaquedrum, disputarase baixo o sistema suizo a 5 roldas e será válido para ELO estándar FIDE, converténdose nunha oportunidade perfecta para os xogadores que buscan mellorar o seu ránking internacional.
O ritmo de xogo será de 60 minutos máis 30 segundos por xogada desde o movemento 1, ofrecendo partidas de gran nivel e concentración. As partidas desenvolveranse en dúas xornadas intensas: o 10 de maio celebraranse dúas roldas (ás 16:00 e ás 18:30 horas), mentres que o 11 de maio xogaranse as tres restantes (ás 10:00, 15:00 e 17:30 horas).
A inscrición, cunha cota xeral de 10 euros, permanecerá aberta ata o 8 de maio ás 22:00 horas, e poderá realizarse a través do correo electrónico escolaluguesaxadrez@gmail.com.
O torneo repartirá trofeos para os cinco primeiros clasificados da clasificación xeral, así como para os primeiros clasificados nas categorías Sub8, Sub10, Sub12, Sub14 e Sub16. Para poder recibir os premios, será necesario estar presente no acto de entrega, agás por causa de forza maior debidamente comunicada e aceptada pola organización.
O evento está organizado coa intención de fomentar a práctica do xadrez competitivo e ofrecer un espazo de encontro para xogadores de todas as idades nun ambiente de respecto, concentración e deportividade.