Olga Louzao, nova xefa de gabinete de Alcaldía do Concello de Lugo
O alcalde de Lugo, Miguel Fernández, anunciou a incorporación de Olga Louzao ao seu equipo de confianza como xefa de gabinete.
Esta nova figura desempeñará un papel clave na asesoría política do rexedor, ademais de xestionar o funcionamento interno do Concello e as súas relacións con outras institucións.
Durante o anuncio, Fernández destacou as razóns da súa elección: "Nesta etapa quero formar un equipo no que prime a capacidade de traballo, a visión de futuro e o amor por Lugo. Por iso quero rodearme dos mellores, como Olga Louzao, unha persoa capaz, preparada e rigurosa, cunha traxectoria impecable e respectada por todos, que traballará para avanzar no Lugo que todos soñamos".
Con esta designación, o rexedor refuerza o seu equipo cunha figura experimentada e cun profundo coñecemento da política local.
Olga Louzao
Olga Louzao (Lugo, 1979) é unha política lucense cunha destacada traxectoria na vida pública. Durante anos, estivo vinculada á política municipal, onde ocupou cargos de relevancia, consolidando a súa reputación como unha profesional rigorosa e cunha gran capacidade de xestión.
Encabezou a lista de Ciudadanos ao Concello de Lugo nas eleccións municipais de 2015 por primeira vez, conseguindo entrar na Casa Consistorial, e volveu facelo ata 2023, cando a formación laranxa non obtivo ningún escano e tivo que despedirse da Corporación Municipal.
Foi unha das voces máis activas na defensa dos intereses de Lugo, apostando pola modernización da administración local e a mellora dos servizos públicos.
A súa experiencia e coñecemento do funcionamento do Concello converténna nunha peza clave no novo equipo de goberno de Miguel Fernández.