Organizan un concerto solidario en Lugo a favor de Capaces este 27 de marzo
A Delegación Territorial da Xunta en Lugo acollerá este venres 27 de marzo un concerto solidario a beneficio da asociación Capaces, entidade centrada na defensa dos dereitos das persoas con Trastorno do Espectro Autista (TEA). Na cita participarán a Tuna de Agrícolas de Madrid e a Asociación de Antigos Tunos de Lugo.
O delegado territorial, Javier Arias, e a presidenta de Capaces, Noelia Fernández, avanzaron que o evento dará comezo ás 20:00 horas no salón de actos do edificio administrativo, onde se agarda reunir público cun dobre obxectivo: gozar da música e contribuír a unha causa social.
Capaces Lugo desenvolve o seu labor co propósito de mellorar a calidade de vida das persoas con TEA e outros trastornos da comunicación, así como a das súas familias. Para iso, impulsa iniciativas orientadas a facilitar apoios, recursos e oportunidades que favorezan a súa autonomía persoal e a súa plena inclusión nos ámbitos social, educativo e laboral.
Neste contexto, Arias destacou a implicación da Xunta no respaldo a este tipo de iniciativas, subliñando a colaboración que mantén coa Federación Autismo Galicia para promover accións de sensibilización social e reforzar a calidade da atención dirixida ás persoas con trastorno do espectro autista.