Os alumnos da USC do Máster de avogacía realizarán prácticas na Deputación de Lugo
![Convenio Máster Oficial Avogacía (1)](https://lugoxa.com/wp-content/uploads/2022/04/Convenio-Master-Oficial-Avogacia-1.jpg)
O presidente da Deputación de Lugo, José Tomé Roca, asinou xunto ao decano do Colexio Oficial de Avogados de Lugo, Félix Mondelo, un convenio de colaboración para o alumnado do Máster Oficial de Avogacía da USC. Oito estudantes realizarán o período de prácticas na institución provincial, completando a súa formación académica na Asesoría Xurídica da Deputación.
Tomé Roca destacou o bo facer dos alumnos e alumnas deste máster no que se atenden cuestións relacionadas coa institución provincial e se dá servizo aos concellos da provincia de Lugo, moitos deles de pequeno tamaño e con poucos recursos para asumir pola súa conta os procesos xurídicos. Así mesmo, incidiu en que “a Asesoría Xurídica supón, polo tanto, a garantía de contar cun servizo de primeiro nivel, atender en tempo en forma este tipo de procesos e un aforro de custes”.
Os alumnos e alumnas realizarán un total de 75 horas de prácticas nos próximos meses. Desempeñarán diferentes tarefas e cumprirán os obxectivos de coñecer o funcionamento da Asesoría Xurídica, estudar expedientes, acudir xunto cos letrados e letradas aos Xulgados, elaborar informes e asistir a actuacións administrativas tanto escritas como orais, entre outras.