Os hortos de Paxariños, en Lugo, xa están cos seus donos temporais
Os novos adxudicatarios dos hortos urbanos municipais do Parque dos Paxariños xa recibiron os seus terreos. Foi a rexedora de Lugo, Lara Méndez, quen lles fixo entrega, onte, dos horteiros.
A alcaldesa quixo compartir a posta a disposición das parcelas aos beneficiarios, instante que aproveitou para agasallalos con hortalizas de tempada como pementos, cebolas, cabazas, cabaciñas e tomates para que puideran comezar xa a cultivalas.
“Trátase dun momento moi especial polo agarimo que dende o Executivo lle puxemos a este proxecto co que, xa dende o anterior mandato, estamos facilitando ás familias recursos que fomentan prácticas sustentables e saudables, de autoconsumo, respectuosas co Medio Ambiente, que ademais favorecen a conservación e coidado da contorna e que tamén propician a creación de espazos de convivencia social ao redor da labranza, tan inherente a nosa identidade lucense”, asegurou Lara Méndez.
O acto incluíu unha charla do experto en agricultura ecolóxica Carlos Brea quen achegou ás e aos asistentes unha serie de pautas e recomendacións, para poñer en marcha prácticas en prol dun aproveitamento sostible da terra.
Un aspecto fundamental, para o Goberno de Lara Méndez, como así se recolle xa nas normas de utilización polas que se rexen estes hortos e dentro das que se lles dá especial preferencia aos cultivos autóctonos e ás plantas comestibles de tradición hortícola, ás aromáticas e tamén ás medicinais.
Pola súa banda, o concelleiro de Medio Ambiente, Miguel Fernández, lembrou que, en total se habilitaron 32 parcelas de, aproximadamente, 30 m² cada unha dentro dunha extensión de máis de 3.000 m² de zona verde, sita entre a Rolda das Fontiñas e o paseo fluvial do Rato, a carón da barrio do Xuíz.
“O recinto conta tamén con espazos dotacionais como estacionamentos e unha caseta de madeira para a garda de apeiros de labranza e material de traballo, e dispón de fontes de rega adaptadas á contorna e de mesas e bancos de uso público. A nosa vontade é que todos os usuarios gocen moito destes hortos, que o seu cultivo lles sexa moi proveitoso non só a nivel produtivo e que entre todos contribuamos a defender valores de coidado e respecto polo planeta”, concluíu o tenente de alcaldesa.
