Os senadores do PP alertan do risco na N-540 e esixen unha intervención urxente
Os senadores do Partido Popular por Lugo, José Manuel Barreiro, José Manuel Balseiro e Juan Carlos Serrano, reuníronse en Portomarín cos alcaldes e voceiros municipais dos concellos afectados para denunciar a “alta sinistralidade” na N-540 e reclamar ao Goberno de Sánchez unha actuación inmediata e integral que garantise a seguridade na estrada, que consideran nun estado “intransitable”.
Segundo os datos oficiais do Executivo, entre 2020 e 2023 rexistráronse máis de 600 accidentes na vía, moitos deles provocados polo mal estado do firme e pola presenza de baches. Os representantes do PP sinalan que isto evidencia o perigo de transitar por esta estrada e que o deterioro do pavimento é un factor determinante en numerosos sinistros.
Preguntado sobre a renovación completa do firme en todos os puntos quilométricos da provincia, o Goberno indica que está en curso a rehabilitación integral entre os quilómetros 0 e 69. Non obstante, os populares critican que existen moitas zonas onde non se realizou ningún traballo e que nas áreas nas que si actuaron as intervencións son “chapuzas que non duran nin dous días”.
Insisten en que a vía precisa dunha rexeneración profunda e completa para poñer fin a anos de deterioro debido á falta de investimento e mantemento por parte do Ministerio de Transportes e Mobilidade Sostible. “É un claro castigo á nosa provincia por parte do Goberno de Sánchez, que está máis centrado noutros asuntos que mesmo levaron á prisión a un dos seus ministros responsables de Transportes, que en resolver os problemas reais dos lucenses e de todos os españois”, destacaron.
Os populares consideran que “a situación é crítica” e lembran que xa se realizaron protestas polo mal estado da N-540, vía fundamental entre Lugo e Ourense. “Hai tramos especialmente perigosos con grandes baches que obrigaban aos condutores a circular a baixa velocidade para evitar accidentes ou danos nos vehículos”, explican.