Os veciños de Cervantes reclaman en Pedrafita a apertura do centro de Doiras
Os veciños e veciñas de Cervantes concentráronse en Pedrafita para seguir a reclamar a promesa da Consellaría de Sanidade sobre a reapertura do consultorio de Doiras, co servizo de enfermería, no mes de agosto. Pasou medio mes de agosto e aseguran que seguen co consultorio de Doiras a medio gas, abrindo só dous días á semana e só co servizo de enfermería. “As veciñas e veciños das parroquias afectadas estamos cansas de que o servizo do Sergas nos tome o pelo coa reapertura deste consultorio, esto non é suficiente, as veciñas e veciños das parroquias afectadas precisan servizo médico tódolos días, precisan que as súas necesidades sexan cubertas ao completo”, explica Amelia Amigo voceira das veciñas afectadas.
O centro de saúde de Doiras viña prestando asistencia sanitaria de luns a venres entre as 10.00 horas e as 15.00 horas a un total de 238 persoas. Agora, esta poboación pode ter que desprazarse 18 quilómetros máis dos que xa fai agora. Unha distancia que en tempo se multiplica pola orografía do concello, chegando a desprazamentos de arredor de 40 minutos, pois o servizo de enfermaría non é suficiente para atendelos, pois as atencións médicas seguen sen estar cubertas en Doiras.
“Desprazamos ata Pedrafita para visibilizar fóra do noso concello este problema da veciñanza xa que falamos dunha poboación de máis de 65 anos na súa maior parte que non dispón de servizo de transporte público,” denuncia Amelia. Isto supón unha vulneración flagrante dos dereitos fundamentais da veciñanza afectada directamente, que impide o seu acceso á sanidade pública de maneira próxima e afonda na desigualdade, cada vez maior, da poboación dos concellos rurais e especialmente da montaña.
Afectará de xeito importante á calidade do servizo prestado no conxunto do concello. “O prometido ao principio do vran polo PP era todo mentira e seguen a facer das súas e a menospreciar á poboación da montaña lucense” afirma esta veciña. Ademais disto, o centro médico de San Román quedou se atención médica varios días no mes de agosto, así que a veciñanza de Cervantes non tivo atención médica en todo o concello, tendo que desprazarse ata Pedrafia. “Isto demostra a atención que dende a Consellaría de Sanidade lle prestan a Cervantes”, engade Amigo.
Por todo seguen as protestas e seguen a rexeitar o peche do consultorio de Doiras, denuncian as mentiras do PP pois o consultorio de Doiras só abre con atención enfermería e só 2 días á semana e demandan á Xunta que cubra de maneira inmediata a praza de médica que fica vacante no centro de saúde de Doiras, así como que garanta a continuidade da enfermaría durante toda a semana co obxectivo de que a poboación adscrita a este centro continúe a recibir asistencia con normalidade nel. Asinan estas petición a asociación cultural xuvenil A Cambela, Anpa CPI Cervantes, Os Xardois, BNG, PSdeG-PSOE, Rente ao Couce, Son de Cores, Casa Quindós, CDR Ancares, Teitos do Piornedo, FADEMUR, Asociación de mulleres rurais Ledicia e A.C. O Teixeiro.