Os veciños de Lugo incrementan a reciclaxe con respecto ao ano pasado
![Reciclaxe loce lugo](https://lugoxa.com/wp-content/uploads/2023/08/Reciclaxe-loce-lugo.jpg)
A veciñanza lucense reciclou no primeiro trimestre deste ano un 54% máis de catón e papel e un 17,5% de residuos de orixe plástica que no ano 2022. Un considerable aumento que obedece ao dimensionamento do novo servizo municipal de limpeza Luce Lugo con máis illas de reciclaxe e fraccións así como ao desenvolvemento de políticas de concienciación.
O responsable do área Transición ecolóxica e Impulso Rural, Miguel Fernández, destacou a implicación cidadá ao respecto. “Existe un aumento do compromiso medioambiental entre a poboación que responde non só a modernización dos equipamentos senón tamén a un traballo de concienciación efectivo, o que contribúe substancialmente a ter unha cidade máis limpa, mellor coidada, e que ofrece unha maior calidade de vida”, sinalou o edil.
O volume de papel e cartón recollido no primeiro trimestre do ano ascende a 223 toneladas (223.192 quilos) máis que no mesmo período do ano anterior. Pola súa parte, en relación a os residuos de orixe plástica, latas e bricks, as e os lucenses depositaron na rede de colectores amarelos 99 toneladas (99.300 quilos) máis.
“Estas cifras teñen unha repercusión destacable e están directamente relacionadas co desenvolvemento das iniciativas enmarcadas na actividade do servicio municipal de limpeza Luce Lugo. Estamos a falar de que cada veciño e veciña incrementou a súa achega ao proceso de reciclaxe en 2,31 quilos ao día de papel e cartón e en 1,05 quilos de plástico por xornada. Algo que nos está a permitir que unha alta porcentaxe de material entre no ciclo de reciclaxe e se reutilice avanzando así no modelo de municipio sostible que somos” explicou Fernández.
A este incremento na reciclaxe de papel e plástico súmase un notable aumento en outro tipo de residuos, como téxtiles ou aceite doméstico, froito das medidas implementadas nos últimos meses polo Goberno de Lara Méndez. A instalación de 75 colectores de roupa traduciuse na recollida de 16 toneladas de téxtiles no primeiro trimestre do ano. Mentres que a extensión da rede de colectores de aceite permitiu reciclar 6 toneladas desta sustancia ata o mes de abril, 790 kg en xaneiro, 1.130 kg en febreiro, 2.040 kg en marzo e outros 2038 kg en abril. Un crecemento exponencial que o tenente de alcaldesa valorou con moita satisfacción ao tempo que convidou á veciñanza a manter e consolidar estes hábitos para avanzar na conservación da contorna e na protección do planeta.