Os Xílgaros de Lugo poñen música ao Corpus Christi e á Ofrenda do Antigo Reino de Galicia 2025
A Agrupación Cultural e Grupo Tradicional Os Xílgaros de Lugo, dirixido por Óscar Pérez, volverá ser protagonista este ano nas celebracións do Corpus Christi e da Ofrenda do Antigo Reino de Galicia, ofrecendo un completo repertorio de marchas e danzas procesionais que acompañarán os actos relixiosos dos días 22 e 29 de xuño.
Nesta ocasión, o grupo estará formado por Merche (bombo e triángulo), Cesar (caixa tradicional), Carmen (pandeireta e triángulo), Genaro, José Luis e o propio Óscar Pérez (todos con gaita). A súa actuación incluirá, entre outras pezas destacadas, a 'Marcha Procesional Antiguo Reino de Galicia', que será interpretada o día 22 durante a adoración ao Santísimo Sacramento e na procesión, e novamente o día 29 na entrada da basílica, nunha versión especial para gaita e órgano a cargo de Óscar Pérez e Luis Varela Castiñeira, organista da Catedral. Tamén soará a 'Marcha do Corpus', que será interpretada na Praza de Santa María e posteriormente na procesión.
Estas composicións convértense en símbolo sonoro dunha tradición que Os Xílgaros de Lugo levan máis dunha década representando con paixón, sendo partícipes de eventos históricos como a proclamación da Catedral de Lugo e do Camiño Primitivo como Patrimonio da Humanidade, ou o 350º aniversario da Ofrenda do Antigo Reino.
Ademais das marchas procesionais, o grupo interpretará muiñeiras, xotas, pasodobres e outras pezas tradicionais de distintos puntos de Galicia, incluíndo temas do seu disco 'A volta da festa – 10 anos', co que celebraron unha década de traxectoria entre 2013 e 2023. As actuacións comezarán ambos días ás 10:00 horas na Praza de Santa María, co acompañamento do 'Pantocrátor', previo á misa das 11:00.