Outeiro de Rei rende homenaxe ao párroco de varias parroquias Ramón Revuelta Refojo
Con motivo da xubilación de Ramón Revuelta Refojo, ata agora párroco de San Pedro de Martul, San Cipriano de Aspai, San Vicente de Candai e Santa María de Vicinte, en Outeiro de Rei, celebrouse un emotivo acto de homenaxe para recoñecer unha traxectoria marcada pola dedicación ao servizo pastoral e ao acompañamento continuo das comunidades parroquiais.
O encontro tivo lugar o sábado 13 de decembro e contou cunha comida de confraternidade no Restaurante González, á que asistiron preto de 90 persoas, entre representantes da Igrexa, familiares, amizades e veciñanza, que quixeron expresar o seu agradecemento e estima ao sacerdote nesta nova etapa da súa vida.
Ao longo do acto fíxoselle entrega dunha placa conmemorativa en recoñecemento ao seu labor e compromiso ao longo dos anos, unha distinción que foi entregada por Mario Vázquez, vicario xeral da Catedral.
A xornada desenvolveuse nun clima de proximidade e agradecemento, no que se destacou a importante pegada humana e espiritual que Ramón Revuelta deixa nas parroquias ás que serviu durante tantos anos.