Palas de Rei acolle a III Edición do Torneo de Mus Camiño de Santiago
Este sábado, 5 de abril, o Centro Comarcal de Palas de Rei será o escenario da III Edición do Torneo de Mus Camiño de Santiago, un evento xa consolidado no calendario de actividades do municipio.
O torneo está organizado pola Asociación LugoMuseiros coa colaboración e patrocinio do Concello de Palas de Rei.
No acto de presentación do torneo estiveron presentes o alcalde de Palas de Rei, Pablo Taboada, o concelleiro Fernando Pensado, o presidente da Asociación LugoMuseiros, Emilio Ruiz, e o vicepresidente da entidade, Marcos Sánchez.
Todos eles destacaron a importancia deste evento, que cada ano atrae máis participantes e gaña maior relevancia dentro da comunidade de xogadores de Mus.
Nesta edición, preto de 90 xogadores procedentes de distintos puntos de Galicia, Asturias e León competirán polo título do campionato. A xornada dará comezo ás 10.00 horas e prolongarase ata as 21.00 horas, momento no que se celebrará a entrega de trofeos e premios. Os mellores clasificados recibirán figuras de Sargadelos e lotes de produtos típicos da comarca da Ulloa.
O presidente da Asociación LugoMuseiros, Emilio Ruiz, valorou moi positivamente a resposta dos participantes en anteriores edicións e subliñou a consolidación deste torneo dentro do Camiño de Santiago.
Pola súa banda, o alcalde de Palas de Rei, Pablo Taboada, agradeceu a implicación da asociación na organización do evento e destacou o impacto positivo que ten para o municipio.
“Este tipo de eventos contribúuen a atraer visitantes a Palas de Rei, especialmente de Galicia e das comunidades veciñas de Asturias e León, servindo ademais como previa para o inicio da temporada estival e de Semana Santa, cando xa se comeza a notar unha maior afluencia de peregrinos e turistas”, afirmou o rexedor.
Con esta terceira edición, o Torneo de Mus Camiño de Santiago reafírmase como unha cita de referencia para os afeccionados a este tradicional xogo de cartas, unindo paixón polo Mus e promoción turística nun enclave estratéxico do Camiño de Santiago.