Palas de Rei acollerá en outubro a exposición fotográfica 'Misión Afganistán'
O Centro Comarcal da Ulloa será escenario, no mes de outubro, da exposición itinerante “Misión Afganistán”, froito dun convenio de colaboración entre o Ministerio de Defensa, a través da Subdirección Xeral de Publicacións e Patrimonio Cultural, e o Concello de Palas de Rei.
A mostra ofrece un percorrido visual pola labor desenvolvida polas tropas españolas en Afganistán desde a súa chegada en 2002 ata o ano 2012. As imaxes, tomadas no propio terreo, van acompañadas dos testemuños de militares que participaron na misión, explicando con detalle a organización e o funcionamento do despregue.
As fotografías foron realizadas tanto por profesionais como por algúns dos propios participantes na misión, permitindo achegarse á realidade diaria do exército e ao traballo que desempeñaron durante unha década.
A exposición poderá visitarse en horario de mañá e tarde ao longo dunha das semanas de outubro no Centro Comarcal, situado na Avenida de Compostela en Palas de Rei.