Palas de Rei activa o servizo de madrugadores e a ludoteca para facilitar a conciliación familiar

As actividades comezarán o 15 de setembro e prolongaranse ata o 19 de xuño coincidindo co calendario escolar

O Concello de Palas de Rei vén de anunciar a posta en marcha do servizo de madrugadores para o novo curso escolar, unha iniciativa pensada para favorecer a conciliación das familias.

O programa arrancará o 15 de setembro e prolongarase ata o 19 de xuño, ofrecendo atención aos escolares de 08.00 a 09.30 horas, antes do inicio das clases.

Xunto con este servizo, tamén se pon en marcha a Ludoteca municipal, que funcionará desde a saída do colexio e ata as 20.00 horas durante o mesmo período lectivo. Deste xeito, preténdese dar cobertura ás necesidades das familias ao longo da xornada escolar.

As persoas interesadas en inscribirse nestas actividades deberán achegarse ás oficinas do Concello para formalizar a matrícula.