Paralizado cautelarmente o parque eólico en Serra do Furco, nos Ancares
O Tribunal Superior de Xustiza de Galicia (TSXG) vén e confirmarlle a Adega que suspende cautelarmente a autorización do proxecto eólico Serra do Furco, promovido por Enel Green Power España S.L. no concello de Becerreá. Este proxecto xunto cos parques eólicos Serra de Piñeira, Serra do Colmo e Chao do Marco, promovidos pola mesma empresa e autorizados pola Xunta o ano pasado, constitúen no seu conxunto un macroproxecto eólico de máis de 130 MW que se pretenden instalar en plena Serra dos Ancares lucenses, os cales tamén foron recorridos por ADEGA pola vía contencioso-administrativa nos tribunais.
Desde Adega manifestamos unha enorme satisfacción por ter conseguido frear a tempo o inicio das obras dun polígono eólico absolutamente incompatíbel coa preservación da poboación de millafre real que habita na zona. A presenza desta ave en perigo de extinción está asociada a espazos de alto valor ambiental e biodiversos, como é o caso da serra do Furco e do resto do cordal dos Ancares onde está proxectada esta concatenación de catro polígonos eólicos industriais. Ademais, o P.E. Serra do Furco ficaría encaixado entre dúas Reserva da Biosfera (Terras do Miño e Ancares lucenses) e moi próximo ás Zonas de Especial Conservación e Rede Natura Cruzul-Agüeira e Ancares-Courel.
As infraestruturas eólicas colocaríanse enfronte mesmo da vila de Becerreá, entre as que se contemplan 5 aeroxeradores de 200 metros de altura, 5 centros de transformación, unha torre meteorolóxica de 118 metros de alto e unha subestación, da que partiría a rede de evacuación compartida cos demais praques eólicos de Enel xa mencionados. Polo tanto, o seu impacto paisaxístico sería moi significativo, non só sobre a vila, senón tamén sobre a Área de Especial Interese Paisaxístico Cruzul-Agüeira e a ruta de peregrinaxe medieval Vía Küning.
Suspensión temporal, ata que se dite sentenza
O Auto xudicial deixa temporalmente sen efecto a resolución do acto administrativo da Dirección Xeral de Planificación Enerxética do 24 de abril de 2023 polo que autoriza o Parque eólico Serra do Furco, cando menos, mentres non haxa sentenza relativa ao recurso contecioso-administrativo interposto por ADEGA contra este megaproxecto. Segundo o TSXG, esta suspensión é obrigada por canto “o acto administrativo é susceptible de causar prexuízos de difícil reparación ao medio ambiente” e porque “existen indicios racionais suficientes que nos fan pensar que dito dano é moi probábel que se dea”.
Como noutras ocasións, o tribunal galego acolle a súa decisión ao principio de precaución do Dereito Comunitario (art. 191 TFUE) que impón actuar con vixilancia e á aplicación do periculum in mora: “De nada valería seguir adiante e permitir a execución do proxecto empresarial se, posteriormente, caso de estimarse o recurso, hai que desfacer o status quio á custa do erario público”.
Adega lembra que a paralización cautelar do proxecto eólico da Serra do Furco, e de moitos outros proxectos eólicos autorizados "de forma supostamente irregular" pola Xunta de Galiza, "non sería posíbel sen a doazón de centos de persoas e entidades que contribuíron solidariamente á campaña Ti Podes Paralos contra a invasión eólica". É por iso que a organización ecoloxista galega parabeniza e manifesta un profundo agradecemento a todas aquelas veciñas e veciños de Furco, de Becerreá e da comarca, así como ás demais colaboradoras de ADEGA que a través da campaña #TPPSerradoFurco e do Fondo Común de Ti Podes Paralos fixeron posíbel que Adega puidese interpoñer recurso contencioso-administrativo e acadar a suspensión cautelar deste proxecto.