Patronal e Sindicatos acadan un acordo para a firma do convenio no sector da alimentación
A patronal do sector do comercio de alimentación de Lugo, Asociación de Empresarios Almacenistas de Alimentación de Lugo, e as centrais sindicais UXT e USO, que ostentan a representatividade de máis do 85% do sector, asinaron o novo convenio colectivo provincial de comercio de alimentación de Lugo con vixencia para o período 2022-2025, segundo informan desde a CEL.
No referido convenio colectivo páctase un incremento salarial do 16,70% para o catro anos de vixencia do mesmo, "o maior incremento rexistrado nos convenios de sector da provincia de Lugo até a data", afirman.
A modo de exemplo, no sector do metal da provincia de Lugo, tras varias e intensas xornadas de folga, alcánzase acordo de firma do convenio cun incremento do 14,5% para o mesmo período de tempo.
A parte empresarial destaca, a maiores, que os incrementos pactados son superiores aos acordados no marco do diálogo social por CEOE-CEPYME e UGT-CCOO no V Acordo para o Emprego e a Negociación Colectiva, mellorando por tanto os criterios pactados para a recuperación dos salarios a nivel estatal, así como superiores aos acordados noutros convenios dirixidos ao mesmo sector de actividade (convenio de grandes almacéns 2023-2026 con incremento total do 14% ou convenio de comercio alimentación da Coruña 2022-2025 con incremento total do 15%).
Finalmente, a patronal destaca que na negociación se acadaron outros acordos importantes para o sector como é o caso da redución de xornada (redución de 13 horas anuais) e incrementos lineais en conceptos económicos tales como plus de domingos e festivos, quebranto de moeda ou dietas.